136:1 David Hieremiae super flumina Babylonis illic sedimus et flevimus cum recordaremur Sion
136:2 in salicibus in medio eius suspendimus organa nostra
136:3 quia illic interrogaverunt nos qui captivos duxerunt nos verba cantionum et qui abduxerunt nos hymnum cantate nobis de canticis Sion
136:4 quomodo cantabimus canticum Domini in terra aliena
136:5 si oblitus fuero tui Hierusalem oblivioni detur dextera mea
136:6 adhereat lingua mea faucibus meis si non meminero tui si non praeposuero Hierusalem in principio laetitiae meae
136:7 memor esto Domine filiorum Edom diem Hierusalem qui dicunt exinanite exinanite usque ad fundamentum in ea
136:8 filia Babylonis misera beatus qui retribuet tibi retributionem tuam quam retribuisti nobis
136:9 beatus qui tenebit et adlidet parvulos tuos ad petram
GOTO NEXT CHAPTER - VULGATE INDEX & SEARCH