Naalakkersuisut Siulittaasuata Lars Emil Johansen-ip ukioq manna Juullip Inuatut nersornaatip pisortatigoortumik tunniunneqarnerani oqalugiaataa

Ilulissat, Kalaallit Nunaat - 28. oktober 1995


Asasakka Juullip Inui
Asasakka Kalaaleqatikka
Asasakka Nunarsuarmioqatikka meeqqap nuannaarnissaanik juullillu oqariartuutaanik pingaartitsisut

Assorsuaq nuannaarutigaara Juullip Inuata nalunngisatsitut pavani sermersuatsinni najugallip sinniisuatut ukioq manna Juullip Inuata nersornaataa tunniussinnaagakku.

Siullerpaameersumik ukioq manna "The Santa Claus of Greenland Foundation"-ip juullip anersaava Juullillu Inuata pingaartitai tunaartaralugit nunarsuatsinnut meeqqanut nuannaarutaallunilu iluaqutaasussamik siammaaniarluni taamatut iliuuseqarpoq.

Juulli tassaavoq ilaqutariit katersuuttarfipput, meeqqat nunarsuaq tamakkerlugu qitiutinneqartarfiat. Juullimiuna Juullillu Inua meeqqat piat. Meeqqammi isaanni qillalaartuni juullip qaamanera ikinneqartarpoq.

Taamaammat Juullip Inuata 'Santa Claus of Greenland Foundation' peqqusimavaa nunarsuatsinni meeqqat ajornartorsiortut tamaasa ikiussagai. Meeqqammi nunarsuatta ilaani suli amerlavallaartut ullutsinni atugarissaarfioqisuni allaat angerlarsimaffissaqanngillalluunniit.

'Santa Claus of Greenland Foundation'-ip aalajangersimavaa nersornaasigassat nunarsuatsinni meeqqanut ikiuerusuttuussasut. Nersornaaserneqartut tassaassapput inuup ajunngitsuussusianik upperinnittut inuunermullu asanninneq qanorluunniit atugaqaraluaraanni suli pingaarnerutinneqarsinnaaneranik nammineq inuunermikkut takutikkaat. Soorlu Juullip Inua taamaattoq - aamma nersornaaserneqartoq ilimagineqassaaq inuuneq atorneqassasoq inoqatit nuannersumik atugaqarnissaat pingaartitaralugu, aammalu nunarsuatsinni meeqqat kiffaanngissuseqarlutik toqqissisimallutillu inuuneqarnissaat ilungersuutissavaa, qanorlunniit ammikkut qalipaateqaraluarpat, sumilluunniit inuunermini aaliangiussaqarluni tunaartaqarlunilu upperisaqaraluarpat.

Nunarsuatsinni taamaattumik inoqarpoq, allanik nallimaneqarani taamatut ilimagisatsinnut ataqqineqartoq tamatsinnit.

Inuk naqisimaneqarsimagaluaqaluni naalliutsitaasimagaluaqaluni ukiorpassuillu paarnaarussaasimagaluarluni suli kiffaanngissusermik inuup ajun-ngissusianik qamuunalu qaamaneqarneranik upperinnittuarsimasoq.

Inuk meeqqanut asannittuunerminik imatut nammineq oqaasii malillugit oqarsimasoq:

"Meeqqat pinnguaqatiginissaat oqaloqatiginissaallu nuannareqaak-
ka; tamakkumi uannut eqqissinermik annertoorsuarmik tuninsisar-
put."
('Vejen til Frihed', q. 103)

juullimullu attuumassuteqarluarnera nammineq oqaasiisa ima nassuiarpaat:

"Sapaatisiortarnerput sapaatip akunnerata ingerlanerani pingartit-
takkatsitulli juulli ukiup ingerlanerani uatsinnut aamma taamaap-
poq. Oqartussat ullormi tassani taamaallaat inunnut ajunngitsulior-

nermik takutitsisarput. Juulip ulluani qaarusummut kalkinik
piiaavissuarmukartinneqarneq ajorpugut, mamakujunnguanillu
pisinissatsinnut periarfissaqartinneqartarpugut. Imatut ileqqorisa-
mik juullimi nerisinneqarneq ajorpugut, taamaallaat kaffisugarput
tiitorfimmik ataatsimik ilaqqissinnaatippaat."
('Vejen til Frihed', q. 424)

Asasakka juullip ikinngutai - The Santa Claus of Greenland Foundation sinnerlugu maanna ukior'manna nersornaat inummut, naak ukiuni 28ini naapertuilluanngitsumik paarnaarussaaqqasimagaluarluni meeqqanut juullimullu asanninnerminik attassiuaannarsimasumut tunniuppara!

Sydafrikap præsidentia Nelson Mandela!


Top of page
Santa Summit introduction and photos
Santa Claus Homepage
Greenland Guide Index

© Copyright Greenland Guide & The Santa Claus of Greenland Foundation
http://www.greenland-guide.dk